ភាពខុសគ្នារវាង អ្នកដឹកនាំ និងអ្នកគ្រប់គ្រង

១. អ្នកដឹកនាំបង្កើតទស្សនវិស័យ អ្នកគ្រប់គ្រងបង្កើតគោលដៅ៖ អ្នកដឹកនាំអាចមើលឃើញពីអ្វីដែលអាចទៅមុខរួច និងជំរុញលើកទឹកចិត្តអ្នកដទៃឱ្យចូលរួមសហការគ្នាដើម្បីឱ្យទស្សនវិស័យនោះក្លាយជាការពិត មានន័យថាគេអាចគិតបានវែងឆ្ងាយជាងមនុស្សធម្មតា។ ចំណែកអ្នកគ្រប់គ្រងផ្តោតសំខាន់លើការរៀបចំគម្រោងការណ៍ តាមដាន និងសម្រេចគោលដៅ ដោយធ្វើឱ្យស្ថានការណ៍ស្ថិតក្រោមការគ្រប់គ្រង។

២. អ្នកដឹកនាំធ្វើឱ្យមានការផ្លាស់ប្តូរ អ្នកគ្រប់គ្រងថែរក្សាអ្វីមានស្រាប់៖ អ្នកដឹកនាំជាអ្នកត្រួសត្រាយផ្លូវដើម្បីស្វែងរកអ្វីថ្មីៗ និងអ្វីដែលអាចទៅរួចដើម្បីភាពរីកចំរើន។ គេជឿថាការផ្លាស់ប្តូរនឹងនាំមកនូវផលវិជ្ជមាន។ ចំណែកអ្នកគ្រប់គ្រង ព្យាយាមរក្សាអ្វីដែលមានស្រាប់ ឬកែតម្រូវប្រព័ន្ធការងារ រចនាសម្ព័ន្ធ និងរបៀបរបបធ្វើការឱ្យមានភាពល្អប្រសើរ ជាជាងផ្លាស់ប្តូរទាំងស្រុង។

៣. អ្នកដឹកនាំមានចំណុចផ្ទាល់ខ្លួន អ្នកគ្រប់គ្រងមានចំណុចដូចអ្នកដទៃ៖ ជាធម្មតា អ្នកដឹកនាំតែងមានចំណុចពិសេសផ្ទាល់ខ្លួនដែលអ្នកដទៃមិនមានដូច ហើយតែងមានក្ដីភ្ញាក់រព្ញកដោយខ្លួនឯងក្នុងការកសាងខ្លួន និងអនុភាពរបស់ខ្លួន និងជឿជាក់លើខ្លួនឯង។ ចំណែកអ្នកគ្រប់គ្រងចូលចិត្តធ្វើអ្វីតាមលំនាំរបស់អ្នកដទៃ និងព្យាយាមកែប្រែខ្លួនតាមតម្រាប់របស់អ្នកដទៃ ជាជាងស្វែងរកការច្នៃប្រឌិតចេញពីខ្លួនឯង។

៤. អ្នកដឹកនាំផ្សងគ្រោះថ្នាក់ អ្នកគ្រប់គ្រងគ្រប់គ្រងហានិភ័យ៖ អ្នកដឹកនាំតែងចូលចិត្តធ្វើអ្វីថ្មីៗ ទោះបីត្រូវរងការបរាជ័យជាដំណំយ៉ាងណាក៏ដោយ ព្រោះគេយល់ថាភាពបរាជ័យជាជំហាននាំទៅរកភាពជោគជ័យ។ អ្នកគ្រប់គ្រងធ្វើការដើម្បីកាត់បន្ថយហានិភ័យឱ្យនៅតិច និងព្យាយាមចៀសវាង និងគ្រប់គ្រងបញ្ហាកុំឱ្យកើតឡើង។

៥. អ្នកដឹកនាំគិតពីផលរយៈពេលវែង អ្នកគ្រប់គ្រងគិតផលរយៈពេលខ្លី៖ អ្នកដឹកនាំតែងមានគោលបំណងពិត និងអាចមើលធ្លុះពីលទ្ធផលខាងមុខ ដោយតែងរក្សាកម្លាំងចិត្តឱ្យនៅខ្ពស់រហូតសម្រេចអ្វីដែលចង់បាន។ អ្នកគ្រប់គ្រងធ្វើការដើម្បីសម្រេចកិច្ចការក្នុងរយៈពេលខ្លី និងចង់បានលទ្ធផលភ្លាមៗ ឬចង់បានការទទួលស្គាល់ឆាប់ៗ។

៦. អ្នកដឹកនាំលូតលាស់ដោយខ្លួនឯង អ្នកគ្រប់គ្រងផ្អែកលើអ្នកដទៃ៖ អ្នកដឹកនាំដឹងច្បាស់ថា បើគេមិនបន្តរៀនសូត្រអ្វីថ្មីៗជាប្រចាំទេ ពួកគេនឹងមិនអាចបន្តឈររឹងមាំ និងប្រាកដជាដួលមិនខាន។ គេបន្តចង់ចេះចង់ដឹងពីអ្វីដែលកំពុងកើតឡើងជុំវិញខ្លួន ដោយព្យាយាមស្រូបយកចំណេះដឹងប្លែកៗដើម្បីពង្រីកការគិតរបស់ខ្លួន។ អ្នកគ្រប់គ្រងតែងភ្ជាប់ខ្លួនជាមួយក្បួនខ្នាតដដែលៗ និងជំនាញដែលរៀនសូត្រពីអ្នកដទៃ ឬអាចត្រឹមកែប្រែវិធីសាស្ត្ររបស់អ្នកដទៃ មកធ្វើជារបស់ខ្លួន។

៧. អ្នកដឹកនាំកសាងទំនាក់ទំនង អ្នកគ្រប់គ្រងកសាងប្រព័ន្ធ និងដំណើរការ៖ អ្នកដឹកនាំផ្តោតសំខាន់លើតម្លៃមនុស្ស និងអ្នកពាក់ព័ន្ធទាំងឡាយដើម្បីសម្រេចកិច្ចការទាំងអស់គ្នា។ ពួកគេព្យាយាមស្វែងយល់ និងចំណាយពេលវេលាជាមួយមនុស្សច្រើន ហើយតែងស្វែងរកវិធីសាស្ត្រនានាដើម្បីកសាងទំនុកចិត្តរវាគ្នានឹងគ្នា។ អ្នកគ្រប់គ្រងផ្តោតសំខាន់លើប្រព័ន្ធការងារ និងវាស់វែងផលដែលសម្រេចបាន ដោយតម្រង់ទៅរកការសម្រេចគោលបំណង និងគោលដៅ។

៨. អ្នកដឹកនាំបង្ហាញ អ្នកគ្រប់គ្រងចង្អុល៖ អ្នកដឹកនាំមានភាពជឿជាក់ថាក្រុមការងាររបស់ពួកគេមានសមត្ថភាព និងមានទេពកោសល្យ ដូច្នេះគេគ្រាន់តែប្រាប់អ្វីគួធ្វើ និងរបៀបធ្វើវាប៉ុណ្ណោះ។ អ្នកគ្រប់គ្រងជាអ្នកចាត់ចែងកិច្ចការ និងផ្ដល់ក្បួនខ្នាតដើម្បីសម្រេចវា។

៩. អ្នកដឹកនាំបង្កើតអ្នកគាំទ្រ អ្នកគ្រប់គ្រងបង្កើតក្រុមការងារ៖ អ្នកដឹកនាំមានអ្នកគាំទ្រនៅពីក្រោយ ដែលជួយជ្រុមជ្រែងដោយស្មោះស្ម័គ្រ ដើម្បីកសាងភាពជោគជ័យ និងសម្រេចគោលដៅ។ អ្នកគ្រប់គ្រងមានបុគ្គលិកនៅក្រោមបញ្ជា និងឱ្យគោរពតាមសេចក្ដីណែនាំ និងធ្វើយ៉ាងណាឱ្យចៅហ្វាយនាយសប្បាយចិត្ត៕

ដកស្រង់ពី ៖ Forward