បារាំងកាត់ទឹកដីកម្ពុជាក្រោមទៅឲ្យវៀតណាម
អាណានិគមបារាំង បានកាត់ទឹកដីកម្ពុជាក្រោម
ទៅឲ្យប្រទេសវៀតណាមត្រួតត្រា មានរយៈពេល ៦១ ឆ្នាំហើយ
គិតមកដល់ត្រឹមថ្ងៃទី ៤ ខែមិថុនា ឆ្នាំ ២០១០ នេះ។ ប៉ុន្តែបើទោះបីជា ៦១
ឆ្នាំបានកន្លងផុតទៅហើយក្តី រឿងរ៉ាវប្រវត្តិសាស្ត្រមួយនេះ នៅតែមានភាពចម្រូងចម្រាសនៅឡើយ
ទាំងនៅដែនដីកម្ពុជាក្រោម ទាំងនៅលើឆាកអន្តរជាតិ
អំពីជោគវាសនារបស់ខ្មែរកម្ពុជាក្រោម។
បញ្ហាចម្រូងចម្រាសនេះគឺដោយសារតែមានការគាបសង្កត់សិទ្ធិសេរីភាព
គ្រប់បែបយ៉ាង និងការប្រើនយោបាយរំលាយពូជសាសន៍ខ្មែរ
ពីសំណាក់អាជ្ញាធរវៀតណាម ហើយខ្មែរកម្ពុជាក្រោម
ទ្រាំទ្រមិនបានក៏ប្រឹងងើបបះបោរប្រឆាំងតវ៉ា។
ប្រវត្តិសាស្ត្រ តាម សៀវភៅ និងឯកសារមួយចំនួន អាណានិគមបារាំង បានកាត់ទឹកដីកម្ពុជាក្រោមចំនួន ២១ ខេត្ត-ក្រុង ទៅឲ្យប្រទេសវៀតណាមត្រួតត្រា តាមរយៈច្បាប់ លេខ ៤៩- ៧៣៣ ដែលបង្កើតឡើង ដោយអាណានិគមបារាំងខ្លួនឯង នៅពេលដែលបារាំង កំពុងដាក់អាណានិគម នៅលើដែនដីកូសាំងស៊ីន (កម្ពុជាក្រោម)។
ទោះយ៉ាងណា មិនមែនបារាំង កាត់ទឹកដីខ្មែរ
ទៅឲ្យប្រទេសវៀតណាមត្រួតត្រា ដោយស្រួលៗនោះទេ
ក្រៅពីបង្ហូរជនជាតិរបស់ខ្លួនបន្តិចម្តងៗ ឲ្យចូលមកតាំងទីលំនៅ
នៅលើទឹកដីនេះ វៀតណាមបានប្រឹងប្រែង និងប្រើគ្រប់មធ្យោបាយទាំងកម្លាំងទ័ព
និងការទូត ដើម្បីបានគ្រប់គ្រងនៅលើទឹកដីនេះ
គួបផ្សំនឹងការធ្វេសប្រហែស របស់មេដឹកនាំខ្មែរ កាលពីសម័យនោះផងដែរ។
ទាក់ទងទៅនឹងលំហូរនៃជនជាតិវៀតណាម មកកាន់ដែនដីកម្ពុជាក្រោម
បើតាមឯកសារ ដែលដាក់បង្ហោះនៅតាមទំព័រវិបសាយ Wikipedia។ ដើមឡើយ វៀតណាម
មិនទាន់មករស់នៅក្នុងទឹកដីកម្ពុជាក្រោមមានចំនួនច្រើននៅឡើយទេ។
លុះដល់ស្ដេចខ្មែរជ័យជេដ្ឋាទី ២ (គ្រងរាជ្យពីឆ្នាំ ១៦១៨ ដល់ ១៦២៨)
បានរៀបអភិសេក ជាមួយបុត្រីស្ដេចវៀតណាម ឈ្មោះ ង៉ុក វ៉ាង ធ្វើជាមហេសីមក
ជនជាតិវៀតណាម
ក៏ចាប់ផ្ដើមទន្ទ្រានចូលមករស់នៅក្នុងទឹកដីកម្ពុជាក្រោម
បន្តបន្ទាប់គ្នារហូតមក។ នៅឆ្នាំ ១៦២៣ ស្ដេចវៀតណាម
បានបញ្ជូនបេសកជនមួយក្រុម មកក្រាបបង្គំសុំស្ដេចខ្មែរ
ឲ្យឈប់យកពន្ធអាករនានា ក្នុងភូមិភាគក្រុង «ព្រៃនគរ» វៀតណាម «សៃហ្គន» និងក្រោយមក ប្តូរទៅជាទីក្រុងហូជីមិញ
ដែលជាកំពង់ផែសមុទ្រពាណិជ្ជកម្មដ៏សំខាន់បំផុត របស់ខ្មែរ។ ដោយស្រឡាញ់
និងលង់ក្នុងកលល្បិចមហេសី ស្ដេចខ្មែរជ័យជេដ្ឋាទី ២
ក៏អនុញ្ញាតតាមពាក្យសុំរបស់ស្ដេចវៀតណាម។ តាំងពីពេលនោះមក វៀតណាម
ចាប់ផ្ដើមវាយលុកយកទឹកដីកម្ពុជាក្រោមបន្តិចម្ដងៗ
រហូតទាល់តែទឹកដីកម្ពុជាក្រោមទាំងមូល
ធ្លាក់ក្នុងកណ្ដាប់ដៃខ្លួនរហូតដល់សព្វថ្ងៃនេះ។
បើតាមលោក ថាច់ សេដ្ឋា ប្រធានសហគមន៍ខ្មែរកម្ពុជាក្រោម
ដែលមានដើមកំណើតនៅខេត្តព្រះត្រពាំង កម្ពុជាក្រោម ប្រទេសបារាំង
ដែលមានមហិច្ឆតា គ្រប់គ្រងនៅឥណ្ឌូចិន បានប្រើនយោបាយមួយ ជាមួយវៀតមិញ
ដែលកាលនោះ មានឥទ្ធិពលខ្លាំង ដើម្បីឲ្យជួយការពារសិទ្ធិអំណាចរបស់ខ្លួន
នៅឥណ្ឌូចិនជាថ្នូរនឹងការសម្រេចកាត់ទឹកដីខ្មែរ ចំនួន ២១ ខេត្តក្រុង
ទៅឲ្យវៀតណាម ជាការលើកទឹកចិត្ត។ ក្រៅពីនេះ លោកថាច់ សេដ្ឋា
ដែលធ្លាប់ចូលរួមក្នុងចលនាតស៊ូខ្មែរក្រោម ដើម្បីរំដោះទឹកដី
ពីអាជ្ញាធរវៀតណាម បានបញ្ជាក់ថា៖«ទន្ទឹមនឹងនយោបាយជាមួយបារំាង
វៀតណាម ក៏បានប្រើនយោបាយ «យកស្រីស្អាត» ជាធ្នាក់សម្រាប់ភ្ជាប់ទំនាក់ទំនងរវាងខ្មែរ និងវៀតណាម។
ព្រះបាទជ័យជេដ្ឋាទី ២ ព្រះអង្គបានរៀបអភិសេក ជាមួយព្រះនាង ង៉ុក វ៉ាង
បុត្រីសេ្តចវៀតណាម»។
លោកថាច់ សេដ្ឋា
ដែលធ្លាប់បួសជាព្រះសង្ឃ ១៣ ព្រះវស្សា និងបានរត់មកកាន់ទឹកដីកម្ពុជា
ចាប់តាំងពីឆ្នាំ ១៩៨៦ ក្រោយពីងើបបះបោរមិនបានសម្រេច
ប្រឆាំងនឹងអាជ្ញាធរវៀតណាមនោះ បានបញ្ជាក់ទៀតថា សេ្តចខ្មែរដែលសោយរាជ្យ
បន្ទាប់ពីព្រះបាទជ័យ ជេដ្ឋាទី ២ បានទាមទារកាន់កាប់ដីខ្មែរក្រោម
ដែលជនជាតិវៀតណាមចូលមករស់នៅលើនោះ ត្រឡប់មកវិញ តែបុត្រីសេ្តចវៀតណាម
បានបដិសេធ ហើយទំនាស់ និងចម្បាំងដណ្តើមទឹកដីខ្មែរក្រោម រវាងស្តេចខ្មែរ
និងវៀតណាម ក៏ចាប់ផ្តើមឡើង ចាប់តាំងពីឆ្នាំ ១៦២៣-១៩៤៩
គឺមកទល់នឹងអាណានិគមបារំាង កាត់ទឹកដីខ្មែរក្រោមទៅឲ្យវៀតណាម។
ចំណែក ព្រះអង្គ យឿន ស៊ិន
ប្រធានសមាគមព្រះសង្ឃខ្មែរកម្ពុជាក្រោម ដែលមានដើមកំណើត នៅស្រុកបាយឆៅ
ខេត្តឃ្លាំង និងធ្លាប់ត្រូវបានអាជ្ញាធរវៀតណាម ចាប់ដាក់ពន្ធនាគារ
ពីរលើក លើកទី ១ ពីឆ្នាំ ១៩៧៥ ដល់ឆ្នាំ ១៩៧៩ និងលើកទី ២ នៅឆ្នាំ ១៩៨៣
ដោយសារតែងើបបះបោរ ប្រឆាំងនឹងការជិះជាន់ ពីសំណាក់អាជ្ញាធរវៀតណាមនោះ
បានមានសង្ឃដីកាថា៖ «ជាតិយើងទន់ខ្សោយ ខ្វះអ្នកដឹកនាំ
អ្នកអវិជ្ជាមានច្រើន ជាងអ្នកមានវិជ្ជា។ បារាំងបានចាញ់បោកវៀតណាម
បានកាត់ទឹកដីខ្មែរក្រោមឲ្យវៀតណាម បារាំងយល់ថា ខ្មែរគ្មានសមត្ថភាព
ធ្វើឲ្យស្រុកទេសរីកចម្រើន បើប្រគល់ឲ្យវៀតណាម អាចនឹងធ្វើឲ្យប្រសើរ
និងចំណេញទំនាក់ទំនងល្អ ជាមួយវៀតណាមថែមទៀត»។
ព្រះអង្គ យឿន ស៊ិន ដែលមានព្រះជន្ម ៧៥ វស្សា បានមានសង្ឃដីកា
បញ្ជាក់ទៀតថា៖ «វៀតណាម ក៏បានយកស្រី និងស្រា
សម្រាប់ទាក់ទាញបារំាងផងដែរ។ ម្យ៉ាងទៀតវៀតណាម ពូកែលុតក្រាប
រណែបរណបជាមួយបារំាង ដោយឲ្យបារំាងមើលឃើញខ្មែរមិនល្អ ហើយទុកចិត្តគេ
ដើម្បីកាត់ទឹកដីខ្មែរក្រោមឲ្យគេ»។
លោកបណ្ឌិត រស់ ចន្ត្រាបុត្រ
សាស្ត្រាចារ្យវិទ្យាសាស្ត្រនយោបាយ និងប្រវត្តិវិទូខ្មែរ បានថ្លែងថា ៖«មូលហេតុដែលនាំឲ្យបារាំង កាត់ទឹកដីកម្ពុជា ប្រគល់ទៅឲ្យវៀតណាម
កក្តាធំបំផុត គឺដោយសារតែមានការវាយលុកពីក្រុមវៀតមិញ
(កុម្មុយនិស្តវៀតណាមខាងជើង) ដែលធ្វើឲ្យរដ្ឋាភិបាលបារាំង
បានផ្លាស់ប្តូរឥរិយាបថ ចំពោះកម្ពុជា ក៏ដូចជាកម្ពុជាក្រោម។
គេឃើញថា
ក្រោយសង្គ្រាមលោកលើកទី ២ ប្រទេសបារាំង បានចុះទន់ខ្សោយ
នៅក្នុងប្រទេសអាស៊ីអាគ្នេយ៍ និងនៅឥណ្ឌូចិន ហើយនៅក្នុងពេលនោះ ពួកយៀកមិញ
ដែលដឹកនាំដោយ ហូ ជីមិញ បានចាប់ផ្តើមធ្វើការវាយលុក
ដែលធ្វើឲ្យបារាំងភ័យព្រួយ»។ លោកបញ្ជាក់ទៀតថា
នៅពេលនោះ បារាំងគ្មានកម្លាំងគ្រប់គ្រាន់
ដើម្បីទប់ទល់ជាមួយនឹងការវាយលុករបស់វៀតណាមខាងជើងទេ ដូច្នេះ
បារាំងបានរៀបចំបំបែកវៀតណាម ឲ្យបែងចែកជាពីរ គឺវៀតណាមខាងជើង
(កុម្មុយនិស្ត ហូ ជីមិញ) និងវៀតណាមខាងត្បូង (ស្តេចបាដាយ)
ហើយដើម្បីឲ្យវៀតណាមខាងត្បូង
រៀបចំកងទ័ពមានកំលាំងគ្រប់គ្រាន់ជាប្រទេសមួយ ដើម្បីអាចវាយទប់ទល់
ជាមួយវៀតណាមខាងជើង បារាំងបានប្រគល់ ទឹកដីកម្ពុជាក្រោម
ទៅឲ្យវៀតណាមខាងត្បូងធ្វើជាថ្នូរ។
ខ្មែរ កម្ពុជាក្រោម ខ្មែរកម្ពុជាក្រោម គឺជាជនជាតិខ្មែរ
រស់នៅតាមតំបន់ដីសណ្តទន្លេមេគង្គក្រោម មានពណ៌សម្បុរ ប្រពៃណី
ទំនៀមទម្លាប់ កាន់ព្រះពុទ្ធសាសនា និយាយភាសារខ្មែរ ប្រើអក្សរសាស្ត្រខ្មែរ
ដូចខ្មែរកណ្តាលយើងដែរ។ តាមឯកសាររបស់សហគមន៍ខ្មែរកម្ពុជាក្រោម
កាលពីឆ្នាំ ២០០៦ បានអះអាងថា ទឹកដីកម្ពុជាក្រោម ២១ ខេត្តក្រុង
មានប្រជាពលរដ្ឋខ្មែរកំពុងរស់នៅ ប្រមាណជាង ១៣ លាននាក់ និងមានវត្តព្រះពុទ្ធសាសនាខ្មែរ
ជាង ៥០០ វត្ត។ ប៉ុន្តែបើតាមឯកសារ ដែលដាក់បង្ហោះ នៅតាមទំព័រវិបសាយ Wikipedia យោងទៅតាមតួលេខ របស់រដ្ឋាភិបាលវៀតណាម
ដែលបានធ្វើជំរឿនក្នុងឆ្នាំ ១៩៩៩ មានពលរដ្ឋខ្មែរក្រោម ចំនួន ១ ០៥៥ ១៧៤
នាក់ កំពុងរស់នៅក្នុងប្រទេសវៀតណាម។
បញ្ហាខ្មែរក្រោមនៅមិនទាន់ចប់ តាម ឯកសារនិងសេចក្តីរាយការណ៍នានាចាប់តាំងពីអាណានិគមបារាំង
បានប្រគល់ទឹកដីកម្ពុជាក្រោម ទៅឲ្យប្រទេសវៀតណាមត្រួតត្រា
ចាប់តាំងពីថ្ងៃទី ៤ ខែមិថុនា ឆ្នាំ ១៩៤៩ មក អាជ្ញាធរវៀតណាម
បានប្រើគ្រប់មធ្យោបាយ ដើម្បីរំលាយពូជសាសន៍ខ្មែរ
តាមរយៈការលុបបំបាត់ជំនឿសាសនា អក្សរសាស្ត្រ ប្រពៃណី ទំនៀមទម្លាប់
បង្ខំឲ្យខ្មែរក្រោម ស្លៀកសម្លៀកបំពាក់វៀតណាម ពាក់ដួន
និងរឹបអូសយកដីធ្លី ព្រមទាំងធ្វើការគាបសង្កត់
ទៅលើសិទ្ធិសេរីភាពគ្រប់បែបយ៉ាង ធ្វើឲ្យមានការប្រឆាំង
តវ៉ាយ៉ាងផ្តាច់ផ្តិលជីវិត ពីសំណាក់ខ្មែរក្រោម ហើយអាជ្ញាធរវៀតណាម
បានធ្វើការបង្ក្រាប ធ្វើឲ្យខ្មែរក្រោមជាច្រើន ត្រូវបានសម្លាប់
និងចាប់ដាក់ពន្ធនាគារជាបន្តបន្ទាប់ រហូតមកដល់សព្វថ្ងៃនេះ។
លោក ថាច់ សេដ្ឋា បានឲ្យដឹងថា៖ «ចាប់តាំងពីក្រោយថ្ងៃទី
៤ ខែមិថុនា ឆ្នាំ ១៩៤៩ មក អាជ្ញាធរ វៀតណាម បានប្រើយុទ្ធសាស្រ្ត
រំលាយពូជសាសន៍ខ្មែរក្រោម ហើយខ្មែរក្រោម បានងើបបះបោរជាច្រើនលើក
ដើម្បីបណ្តេញវៀតណាម ចេញពីកម្ពុជាក្រោមវិញ។ ការងើបបះបោរជាច្រើនលើកនេះ
ធ្វើឲ្យអ្នកប្រាជ្ញ បញ្ញវន្តខ្មែរ រាប់ពាន់នាក់ ត្រូវបានចាប់ខ្លួន
បញ្ជូនទៅឃុំឃាំង ក្នុងពន្ធនាគារ ហើយមួយចំនួន
ត្រូវបានធ្វើទារុណកម្មរហូតដល់ស្លាប់ មេចលនាធំៗ របស់ខ្មែរក្រោម
ត្រូវបានអាជ្ញាធរវៀតណាម ចាក់ថ្នាំសម្លាប់ក្នុងពន្ធនាគារ សាលារៀន
និងវត្តអារាមខ្មែរជាច្រើនត្រូវបិទទ្វារ
ឬយកទៅធ្វើជាកន្លែងចិញ្ចឹមសត្វ»។
ដោយសារតែហេតុផលនេះហើយ ទើបខ្មែរកម្ពុជាក្រោម
ដែលរួចរស់ជីវិត រត់ភៀសខ្លួនចេញពីកម្ពុជាក្រោម មកកាន់ប្រទេសកម្ពុជា
និងទៅកាន់បណ្តាប្រទេសមួយចំនួនទៀត នៅលើពិភពលោក
បានធ្វើការថ្កោលទោសយ៉ាងខ្លាំងក្លា ទៅលើរដ្ឋាភិបាលវៀតណាម
ហើយបានបង្កើតជាចលនាតស៊ូមួយចំនួន។ ក្រោយមក
បានរួមគ្នាបង្កើតជាសហព័ន្ធខ្មែរកម្ពុជាក្រោមពិភពលោក
ដោយមានការទទួលស្គាល់ពីអង្គការអន្តរជាតិ UNPO (អង្គការតំណាងប្រទេស ដែលគ្មានអាសនៈនៅអង្គការសហប្រជាជាតិ)
ដើម្បីធ្វើការតស៊ូតាមផ្លូវច្បាប់
ទាមទារសិទ្ធិសម្រេចវាសនាខ្លួនដោយខ្លួនឯង នៅលើទឹកដីកម្ពុជាក្រោម
ដែលស្ថិតនៅភាគខាងត្បូងប្រទេសវៀតណាមបច្ចុប្បន្ន។ នៅក្នុងលិខិតជូនពរមួយ
របស់សហព័ន្ធខ្មែរកម្ពុជាក្រោម ចុះថ្ងៃទី ៩ ខែមេសា ឆ្នាំ ២០១០
ដែលដាក់ចំណងជើងថា «ដំណើរឆ្ពោះទៅកាន់មាតុភូមិ» ត្រង់ឃ្លាមួយ បានបញ្ជាក់ប្រាប់ខ្មែរកម្ពុជាក្រោម
ដែលកំពុងរស់នៅឯដែនដីកម្ពុជាក្រោម និងនៅជុំវិញពិភពលោកថា «យើងជាម្ចាស់ស្រុក ដូចនេះ
ត្រូវតែមានសិទ្ធិរស់នៅពេញមុខពេញមាត់ ដូចជាតិសាសន៍នានា
លើពិភពលោកដែរ ដូច្នេះ យើងត្រូវតែមានស្មារតីជាតិ សាមគ្គីរួបរួម
ស្មោះត្រង់បម្រើជាតិ នៅគ្រប់កាលៈទេសៈទាំងអស់ ពេលជាតិត្រូវការ»។
លិខិតក៏បានរៀបរាប់ពីសកម្មភាព និងផែនការ ដែលសហព័ន្ធនេះ
ហៅថា «ផែនការឆ្ពោះទៅកាន់មាតុភូមិ
ដើម្បីកែប្រែជីវិតប្រចាំថ្ងៃរបស់ខ្មែរក្រោម
ដែលកំពុងរស់នៅក្រោមនឹមអាណានិគមវៀតណាម» នោះផងដែរ។
មិនអាច ទាក់ទងលោកទ្រិញ បាកឹម
អ្នកនាំពាក្យស្ថានទូតវៀតណាម ប្រចាំនៅកម្ពុជា
ដើម្បីអធិប្បាយពីបញ្ហាប្រវត្តិសាស្ត្រ និងការចោទប្រកាន់នានា
ទាក់ទងទៅនឹងការធ្វើទុក្ខបុកម្នេញ ទៅលើខ្មែរកម្ពុជាក្រោមនេះបានទេ
កាលពីថ្ងៃព្រហស្បតិ៍ម្សិលមិញ ដោយទូរស័ព្ទរបស់លោក បានរោទ៍ជាច្រើនលើក
តែពុំមានអ្នកទទួល។ ប៉ុន្តែទោះជាយ៉ាងណា នាពេលកន្លងមក
រដ្ឋាភិបាលវៀតណាម តែងតែធ្វើការបដិសេធ
នូវរាល់សេចក្តីរាយការណ៍និងការចោទប្រកាន់
ស្តីពីការរំលោភសិទ្ធិមនុស្សធ្ងន់ធ្ងរ ទៅលើខ្មែរកម្ពុជាក្រោម ហើយថា
ខ្មែរកម្ពុជាក្រោម មិនមែនជាជនជាតិដើមនោះទេ
គឺគ្រាន់តែជាជនជាតិភាគតិចប៉ុណ្ណោះ ហើយរដ្ឋាភិបាលវៀតណាម
បានយកចិត្តទុកដាក់ទំនុកបំរុង ដូចពលរដ្ឋវៀតណាមផងដែរ។
បើតាមទំព័រវិបសាយ របស់សារព័ត៌មានព្រៃនគរ នៅក្នុងកិច្ចប្រជុំប្រចាំឆ្នាំ
របស់អង្គការសហប្រជាជាតិ ស្តីពីសិទ្ធិជនជាតិដើមនៅជុំវិញពិភពលោក
ដែលបានបញ្ចប់កាលពីថ្ងៃទី ៣០ ខែមេសាឆ្នាំ ២០១០ លោកស្រីហ័ង ធីថាញ់ង៉ា
លេខាធិការទី ២ នៃគណៈកម្មាធិការអចិន្រៃ្តយ៍ទី ៣ របស់សាធារណរដ្ឋ សង្គមនិយមវៀតណាម
ប្រចាំនៅអង្គការសហប្រជាជាតិ បានបដិសេធ
ទៅនឹងការចោទប្រកាន់របស់សហព័ន្ធខ្មែរកម្ពុជាក្រោម
និងបានចាត់ទុកការចោទប្រកាន់នានា ទាក់ទងនឹងបញ្ហាខ្មែរក្រោមថា
ផ្អែកលើព័ត៌មានប្រឌឹត និងបំភ្លៃផ្ទុយអំពីសកម្មភាព ដែលរដ្ឋាភិបាលវៀតណាម
បានយកចិត្តទុកដាក់ជួយជនជាតិភាគតិច នៅក្នុងប្រទេសវៀតណាម។
លោកស្រីហ័ង ធីថាញ់ង៉ាបានចោទថា ៖ «ពួកបុគ្គល «សហព័ន្ធខ្មែរកម្ពុជាក្រោម» មិនមែនជាតំណាងជនជាតិភាគតិចណាមួយ
នៅក្នុងប្រទេសវៀតណាមទេ។
ពួកនេះ ធ្វើសកម្មភាពនយោបាយដើម្បីបំបែករដ្ឋ»។
ទោះជាយ៉ាងណា លោកបណ្ឌិត រស់ ចន្ត្រាបុត្រ បានថ្លែងថា
រឿងបារាំងកាត់ទឹកដីកម្ពុជាក្រោម ប្រគល់ទៅឲ្យប្រទេសវៀតណាមត្រួតត្រា
កាលពីថ្ងៃទី ៤ ខែមិថុនា ឆ្នាំ ១៩៤៩
គឺបានក្លាយទៅជារឿងប្រវត្តិសាស្ត្រពិភពលោកមួយ ហើយសៀវភៅប្រវត្តិសាស្ត្រវៀតណាមខ្លះ
ក៏បានសរសេរទទួលស្គាល់ដែរ «ដូច្នេះ វៀតណាម
មិនអាចកាឡៃប្រវត្តិសាស្ត្រនេះបានទេ។ កម្ពុជាក្រោម គឺជាអតីតទឹកដីខ្មែរ»។
សុំកំណត់ថ្ងៃបាត់បង់ទឹកដីកម្ពុជាក្រោម
ជាទិវាបុណ្យជាតិ
កាល ពីថ្ងៃទី ៥ ខែមេសា ឆ្នាំ ២០១០ តំណាងរាស្ត្រគណបក្សសម
រង្ស៊ី ចំនួន ១០ រូប បានដាក់លិខិតថ្វាយព្រះមហាក្សត្រ សម្តេចព្រះបរមនាថ
នរោត្តមសីហមុនី ទូលសូមកំណត់ថ្ងៃបាត់បង់ទឹកដីកម្ពុជាក្រោម ទី ៤ ខែមិថុនា
ដាក់ក្នុងប្រតិទិនប្រចាំឆ្នាំ ជាថ្ងៃបុណ្យជាតិ នៃទិវាកាន់ទុក្ខ។
នៅក្នុងលិខិតរបស់តំណាងរាស្ត្រគណបក្ស ប្រឆាំង
បានលើកឡើងថា កាលពីថ្ងៃទី ៤ ខែមិថុនា ឆ្នាំ ១៩៤៩ រដ្ឋាភិបាល
និងរដ្ឋសភាបារាំង បានកាត់ទឹកដីកម្ពុជាក្រោម ចំនួន ២១ ខេត្តក្រុង
ទៅឲ្យប្រទេសវៀតណាមត្រួតត្រាដោយខុសច្បាប់ ហើយចាប់តាំងពីពេលនោះមក
ពលរដ្ឋខ្មែរកម្ពុជាក្រោម ត្រូវបានកាត់ផ្តាច់រាល់ការទទួលខុសត្រូវ
និងការទាក់ទងពីការគ្រប់គ្រង របស់ប្រទេសកម្ពុជា
ហើយទៅរស់នៅក្រោមការគ្រប់គ្រង តាមបែបអាណានិគម និងប្រព័ន្ធផ្តាច់ការ
ដោយមានការគាបសង្កត់គ្រប់បែបយ៉ាង ពីសំណាក់អាជ្ញាធរវៀតណាម
ធ្វើឲ្យពលរដ្ឋខ្មែរកម្ពុជាក្រោម រស់នៅរងទុក្ខខ្លោចផ្សា
ទទួលរងការឈឺចាប់ឥតមានពេលល្ហែ ដូចកូនកំព្រាម្តាយ។ គណបក្សសម រង្ស៊ី
បានលើកឡើងថា ៖ «ដើម្បីឲ្យកូនខ្មែរជំនាន់ក្រោយ
ចងចាំនូវប្រវត្តិសាស្ត្រដ៏ជូរចត់ មិនអាចបំភ្លេចបានរបស់ខ្មែរក្រោម
ទើបពួកទូលព្រះបង្គំ បានទូលសុំឲ្យព្រះអង្គ មេត្តាដាក់បញ្ចូលថ្ងៃទី ៤
ខែមិថុនា ទៅក្នុងប្រតិទិនប្រចាំឆ្នាំ សម្រាប់ឲ្យមន្ត្រីរាជការ
និងប្រជាពលរដ្ឋខ្មែរ បានប្រារព្ធពិធីកាន់ទុក្ខទាំងអស់គ្នា»។
ប៉ុន្តែ លោក ទិត សុធា អ្នកនាំពាក្យ អង្គភាពព័ត៌មាន
និងប្រតិកម្មរហ័សនៃទីស្តីការគណៈរដ្ឋមន្ត្រី
បានថ្លែងកាលពីថ្ងៃព្រហស្បតិ៍ថា រដ្ឋាភិបាលកម្ពុជា
នៅតែប្រកាន់ជំហរសោកស្តាយ ចំពោះការបាត់បង់ទឹកដីខ្មែរក្រោម ដែលបារាំង
បានកាត់ទឹកដីនេះ ទៅឲ្យប្រទេសវៀតណាម។ លោកថ្លែងថា៖ «ខ្មែរក្រោម
វាស្ថិតនៅក្រោមការគ្រប់គ្រងរបស់រដ្ឋាភិបាលវៀតណាមទៅហើយ
យើងអាណិតអាសូរ ស្រឡាញ់ទឹកដីយើងណាស់
តែយើងក៏មិនអាចធ្វើសកម្មភាពទាមទារណាមួយ
ដើម្បីយកកម្ពុជាក្រោមមកវិញបានដែរ»។
ទោះយ៉ាងណាលោកទិត
សុធា បានទទួលស្គាល់ថា ការរំឭកខួបនៃការបាត់បង់ទឹកដីខ្មែរក្រោម
គឺធ្វើឲ្យយើងចងចាំទៅអនាគត នូវការដឹកនាំឲ្យមានការប្រុងប្រយ័ត្ន
ថែរក្សាការពារបូរណភាពទឹកដី ជៀសវាងការបាត់បង់ទឹកដីដោយប្រការណាមួយ
ប៉ុន្តែលោកបញ្ជាក់ថា រដ្ឋាភិបាលកម្ពុជាមិនអាចជ្រើសយកថ្ងៃទី ៤ ខែមិថុនា
បញ្ចូលទៅក្នុងប្រតិទិន ជាថ្ងៃបុណ្យជាតិទេ
ព្រោះយើងមានថ្ងៃបុណ្យជាតិជាច្រើនហើយ។ លោកថ្លែងថា ៖ «ការមិនដាក់ថ្ងៃ ៤ មិថុនា ចូលទៅក្នុងប្រតិទិនសម្រាប់បុណ្យជាតិ
នៃថ្ងៃបាត់បង់ទឹកដីខ្មែរក្រោម គឺមិនមែនមានន័យថា
យើងមិនគោរពស្រឡាញ់ពលរដ្ឋកម្ពុជាក្រោមនោះទេ»៕
ប្រែសម្រួលៈ ជាវង់ សុគារិទ្ធ
សម្រួលអត្ថបទដោយ ឃី ពិសី
សូមចុចទីនេះដើម្បីចែករំលែកបន្ត....
Subscribe to:
Post Comments
(
Atom
)
No comments :
Post a Comment